作為芫荽迷就一定要bookmark呢間日本過江龍，鬼金棒嘅芫荽味噌拉麵啦！其實2009年登陸東京神田嘅鬼金棒除咗芫荽味噌拉麵，另一代表作就係麻辣味噌拉麵！湯底用豬骨、雞骨同鮮魚熬製超過10個鐘，加上佢哋獨創嘅5級自選麻辣，無論係食辣嘅初哥，定係想提升自己嘅嗜辣程度，都可以嚟挑戰一吓！所以我哋再次重臨銅鑼灣嘅鬼金棒拉麵店，挑戰開始。
A姐之選：增量叉燒麻辣味噌拉麵（中辣小麻）
上次食走麻，今次就提高一級，試吓小麻啦！小麻嘅麻度唔會太強，唔會麻痺到無晒知覺！麻同辣嘅味道好有層次，香濃嘅辣味，仲帶有豚骨香味。呢度嘅叉燒同平時嘅好唔一樣，採用五花肉，肥瘦分明，充滿油香，可惜就未有入口即化嘅感覺！
M佬之選：炒豆芽菜辣麻味噌拉麵（中辣中麻）
鍾意食芫荽嘅M佬，更愛食炒豆芽菜，所以今次佢繼續食炒豆芽菜辣麻味噌拉麵！豆芽菜即叫即炒，條條都脆卜卜同肥嘟嘟，好香口㗎！至於拉麵嘅辣度方面，今次繼續係中辣中麻，拉麵非常掛湯，條條拉麵都充滿辣麻香味，唔錯！
